Periskopyo
Mga Nakakalasong Katotohanan

     Ang halalan para sa sa sentral at lokal na pamahalaan pampaaralan ay tapos na. Ang mga bagong opisyal ay sumumpa na sa bulwagang palapagan. Subalit ang mga bagong opisyal ba ay batid ang mga masasakit na katotohanan na nangyayari sa ating pamahalaan? Alam ba nila ang mga lasong nakakaapekto sa ating lipunan?

     Korapsyon, katiwalian at kawalang – kakayahan sa pamumuno ay ilan lamang sa mga lasong pampamahalaan na nakaakibat na sa mga opisyal, hirang man o halal. Ito’y tila mga pandemiko na lubhang nakakahawa at mabilis kumalat sa lahat ng mga sangay ng gobyerno o maging sa mga simpleng bagay. Ang masama pa ay maari din itong makahawa sa mga susunod na henerasyon.

     Ang korapsyon ay ang paraan ng pagkamal ng malaking salapi mula sa kaban ng bayan. Ito ay nagdudulot ng pagigigng lubos na mayaman ng mga “Korap” na opisyal na ikinadudulot ng paghihirap ng ordinaryong mamamayan. Ang sakit na ito ay talamak sa ating gobyerno kaya tayo nagkakaroon ng malaking utang sa loob at labas ng bansa.

     Samantalang ang katiwalian ay ang paraan ng pagkuha ng kapakinabangan gamit ang kapangyarihan maging ito’y sa personal na bagay o pera. Ito’y hindi na maipagkakaila sapagkat laganap itong nangyayari sa ating lipunan hindi lamang sa pamahalaan kundi na rin sa mga simpleng bagay sa ating buhay. Ang ganitong sakit ay kailangang mabigyang lunas at maiwasan na.

     Ang kawalang – kakayahan sa pamumuno sa kabilang banda ay ang pagtatalaga ng isang opisyal o mamumuno kahit hindi sapat ang kaalaman nito at kulang sa kredibilidad sa iniatang na gawain. Nagreresulta ito ng palpak na trabaho na ang dehado ay ang ordinaryong mamamayan.

     Ang halalan sa ating paaralan ay naganap na. Maraming kandidato ang nangako na sana ay hindi mapako. Ang mga guro ay hindi nagkulang sa pagtuturo sa atin ng tamang pagboto. Binigyang linaw nila sa atin ang kahalagahan ng botohan at tamang pakikiisa dito.